पोखरिया–५ सतवरियामा एमालेको २१ सदस्यीय वडा कमिटी गठन

  शैलेश साह, पोखरिया । पर्साको पोखरिया नगरपालिका–५ सतवरियामा नेकपा (एमाले) को २१ सदस्यीय वडा कमिटी गठन गरिएको छ। पार्टी संगठनलाई वडा तहसम्म...

 

शैलेश साह, पोखरिया ।

पर्साको पोखरिया नगरपालिका–५ सतवरियामा नेकपा (एमाले) को २१ सदस्यीय वडा कमिटी गठन गरिएको छ। पार्टी संगठनलाई वडा तहसम्म थप सुदृढ, सक्रिय र व्यवस्थित बनाउने उद्देश्यले आयोजित बैठकबाट नयाँ वडा कमिटी गठन गरिएको हो।

मोहम्मद रहीम मियाँको अध्यक्षतामा बसेको बैठकले रामबालक प्रसाद चौहानको अध्यक्षतामा २१ सदस्यीय वडा कमिटी सर्वसम्मत रूपमा गठन गरेको जनाइएको छ। नवगठित कमिटीको उपाध्यक्षमा नन्दकिशोर यादव ‘टाइसन’ र सचिवमा हजारी प्रसाद चौहान चयन भएका छन्।

वडा कमिटी गठनसँगै स्थानीय तहमा पार्टीको संगठन विस्तार, कार्यकर्ताबीचको समन्वय तथा आगामी राजनीतिक गतिविधिलाई प्रभावकारी बनाउने विषयमा बैठकमा छलफल भएको थियो। नवगठित कमिटीलाई पार्टीको नीति, संगठनात्मक गतिविधि तथा जनतासँगको सम्बन्धलाई प्राथमिकतामा राखेर अघि बढ्न नेताहरूले सुझाव दिएका थिए।

बैठकमा प्रमुख अतिथिका रूपमा नेकपा (एमाले) प्रदेश कमिटी सदस्य तथा पोखरिया नगरपालिकाका नगर प्रमुख प्रद्युम्न प्रसाद चौहान सहभागी थिए। त्यस्तै, जिल्ला सचिवालय सदस्य सुरेश पासवान, नगर कमिटी संयोजक भगवान प्रसाद पटेल, प्रभात पटेललगायतका नेताहरूको उपस्थिति रहेको थियो।

कार्यक्रममा अशोक वर्णवाल, अमर प्रसाद रौनियार, चन्द्रिका प्रसाद रौनियार, रसिद मियाँलगायतका नेता तथा कार्यकर्ताको समेत सहभागिता रहेको थियो। उनीहरूले वडा तहमा पार्टीको संगठनलाई थप मजबुत बनाउन स्थानीय कार्यकर्ताबीच एकता, सहकार्य र सक्रियता आवश्यक रहेको धारणा राखेका थिए।

बैठकमा पछिल्लो समय पार्टीभित्र असन्तुष्ट रहेका नेता तथा कार्यकर्तालाई संवादमार्फत सम्झाइ–बुझाइ गरी पुनः संगठनको गतिविधिमा सक्रिय बनाउने विषयमा समेत छलफल भएको थियो। पार्टीमा रहेका सबै नेता तथा कार्यकर्तालाई एकताबद्ध बनाएर संगठनलाई अगाडि बढाउनुपर्नेमा सहभागी नेताहरूले जोड दिएका थिए।

त्यसैगरी, नवगठित वडा कमिटीलाई स्थानीय जनताका समस्या तथा आवश्यकतासँग जोडिएर काम गर्न तथा पार्टीका कार्यक्रमलाई प्रभावकारी रूपमा सञ्चालन गर्न आग्रह गरिएको थियो। वडा तहमा संगठन विस्तारसँगै नियमित बैठक, कार्यकर्ता परिचालन र जनसम्पर्कका गतिविधिलाई निरन्तरता दिने विषयमा समेत छलफल भएको जनाइएको छ।

बैठकमा सहभागी कार्यकर्तालाई नेकपा (एमाले) को संगठन, नीति, पार्टीका गतिविधि तथा आगामी कार्यक्रमबारे प्रशिक्षणसमेत दिइएको थियो। प्रशिक्षणका क्रममा पार्टी संगठनलाई बलियो बनाउन कार्यकर्ताको भूमिका महत्वपूर्ण हुने भन्दै जिम्मेवारीअनुसार सक्रिय भएर काम गर्न आग्रह गरिएको थियो।

नवगठित वडा कमिटीका पदाधिकारी तथा सदस्यहरूले पार्टीले दिएको जिम्मेवारीलाई प्रभावकारी रूपमा निर्वाह गर्दै वडा तहमा संगठन विस्तार र जनसम्पर्कलाई प्राथमिकता दिने प्रतिबद्धता व्यक्त गरेका छन्।