शैलेश गुप्ता 24 वीरगञ्ज।
वीरगञ्ज महानगरपालिकाले सहरलाई सफा, सुन्दर, हराभरा तथा व्यवस्थित बनाउने उद्देश्यले गठन गरेको 'एक्सन टिम'को नेतृत्व सरसफाइ प्रमुख सरफुद्दिन मियाँलाई जिम्मेवारी दिएको छ।
सोमबारदेखि जिम्मेवारी सम्हालेसँगै मियाँको नेतृत्वमा सहरका विभिन्न स्थानमा विशेष सरसफाइ अभियान सञ्चालन गरिनुका साथै सडकपेटी (फुटपाथ) अतिक्रमण हटाउने अभियानलाई तीव्रता दिइने भएको छ।
वीरगञ्ज महानगरपालिकाका कार्यवाहक प्रमुख इम्तियाज आलमले जिम्मेवारी हस्तान्तरण गर्दै सहरमा कुनै पनि प्रकारको फोहोर र अतिक्रमण हुन नदिन कडा निर्देशन दिनुभएको छ। महानगरले सञ्चालन गर्ने सरसफाइ तथा व्यवस्थापनका कार्यमा कुनै कमजोरी हुन नदिन र परिणाममुखी ढंगले काम गर्न उहाँले एक्सन टिमलाई निर्देशन दिनुभयो।
कार्यवाहक प्रमुख आलमका अनुसार यो अभियान मुख्य सडकमा मात्र सीमित रहने छैन। महानगरका सबै ३२ वटै वडामा प्रभावकारी रूपमा सरसफाइ, अतिक्रमण नियन्त्रण तथा सार्वजनिक स्थल व्यवस्थापनका कार्यक्रम सञ्चालन गरिनेछ।
उहाँले महानगरको गरिमा कायम राख्दै आम नागरिकको स्वास्थ्य, सुविधा र दैनिक जनजीवनलाई प्राथमिकतामा राखेर नागरिकमैत्री सेवा प्रवाह गर्न पनि निर्देशन दिनुभएको छ।
महानगरपालिकाले गठन गरेको एक्सन टिमबाट सहरको सरसफाइ व्यवस्थापनलाई थप प्रभावकारी बनाउने, फुटपाथ अतिक्रमण नियन्त्रण गर्ने तथा सार्वजनिक स्थानलाई व्यवस्थित बनाउने अपेक्षा गरिएको छ।
COMMENTS