शैलेश गुप्ता वीरगञ्ज, २५ असार।
वीरगञ्ज महानगरपालिकाले वितरण गर्दै आएको लोककल्याणकारी सूचना अबदेखि स्थानीय साप्ताहिक पत्रपत्रिकाहरूले पनि पाउने भएका छन्। महानगरपालिकाको आमसञ्चार माध्यम प्रवर्द्धन तथा नियमन समितिले यसअघिको विभेदपूर्ण निर्णय सच्याउँदै साप्ताहिक पत्रपत्रिकालाई समेत सूचीकरणका लागि आह्वान गर्ने निर्णय गरेपछि स्थानीय सञ्चारमाध्यममा सकारात्मक सन्देश गएको छ।
यसअघि महानगरपालिकाले साप्ताहिक पत्रिकालाई सूचीकरणबाट बाहिर राखेको निर्णयका कारण उनीहरू लोककल्याणकारी सूचना प्रकाशनबाट वञ्चित हुँदै आएका थिए। उक्त निर्णय महानगरकै आमसञ्चारसम्बन्धी ऐन–कानुनको भावना विपरीत रहेको भन्दै नेपाल पत्रकार महासंघसहित विभिन्न सञ्चारसम्बद्ध संस्थाहरूले निरन्तर सच्याउन माग गर्दै आएका थिए।
आमसञ्चार माध्यम प्रवर्द्धन तथा नियमन समितिका संयोजक शत्रुधन नेपालको अध्यक्षतामा बसेको बैठकले विगतको व्यवस्था परिमार्जन गर्दै स्थानीय साप्ताहिक पत्रपत्रिकालाई पनि सूचीकरण प्रक्रियामा समावेश गर्न औपचारिक निर्णय गरेको हो। अब महानगरपालिकाले सूचीकृत हुन इच्छुक साप्ताहिक पत्रपत्रिकासँग आवेदन आह्वान गर्ने तयारी गरेको जनाएको छ।
यस निर्णयमा वीरगञ्ज महानगरपालिकाका कार्यवाहक प्रमुख इम्तियाज आलमको सकारात्मक भूमिका रहेको बताइएको छ। उहाँले स्थानीय सञ्चारमाध्यमको सबलीकरण लोकतन्त्र, सुशासन र जवाफदेहिताका लागि आवश्यक रहेको उल्लेख गर्दै महानगर सधैँ सञ्चारमाध्यमको प्रवर्द्धनमा प्रतिबद्ध रहने बताउनुभयो।
"सञ्चारमाध्यम बलियो भए लोकतन्त्र र सुशासन बलियो हुन्छ। त्यसैले महानगर स्थानीय सञ्चारमाध्यमको प्रवर्द्धनका लागि अग्रसर छ," कार्यवाहक प्रमुख आलमले भन्नुभयो। "वीरगञ्ज महानगर सञ्चारमाध्यम प्रवर्द्धनका लागि कानुन बनाउने देशकै पहिलो पालिका हो। कानुनमा भएको व्यवस्थाअनुसार हामी सधैँ सकारात्मक र रचनात्मक ढंगले अघि बढ्नेछौँ।"
महानगरपालिकाको यो निर्णयसँगै वीरगञ्जबाट नियमित रूपमा प्रकाशन हुँदै आएका दर्जनौँ साप्ताहिक पत्रपत्रिका तथा ती सञ्चारमाध्यममा आबद्ध श्रमजीवी पत्रकार प्रत्यक्ष रूपमा लाभान्वित हुने अपेक्षा गरिएको छ। सञ्चार क्षेत्रका सरोकारवालाले यसलाई स्थानीय सञ्चारमाध्यमको संरक्षण, प्रवर्द्धन र प्रेस स्वतन्त्रताको सम्मानतर्फ महानगरले चालेको सकारात्मक कदमका रूपमा स्वागत गरेका छन्।
COMMENTS