वीरगन्ज, असार १३।
वीरगन्ज महानगरपालिकाका कार्यवाहक नगरप्रमुख इम्तियाज आलमको विशेष निर्देशनपछि महानगरका विभिन्न बजार क्षेत्रमा फोहोर संकलन र जाम भएका नालाहरू सफा गर्ने कार्यलाई तीव्रता दिइएको छ।
महानगरपालिकाको मुख्य व्यापारिक केन्द्र मानिने अलखियामठ, आदर्शनगर लगायतका क्षेत्रमा केही समयदेखि फोहोर थुप्रिने र नाला जाम हुने समस्याका कारण स्थानीय बासिन्दा तथा व्यवसायीले सास्ती खेप्दै आएका थिए। जनगुनासो बढेपछि कार्यवाहक नगरप्रमुख आलमले सरसफाइ शाखा र प्राविधिक टोलीलाई तत्काल परिचालन गर्न निर्देशन दिएका हुन्।
निर्देशनलगत्तै महानगरको सरसफाइ टोली आवश्यक उपकरण र सवारीसाधनसहित प्रभावित क्षेत्रमा खटिएको छ। सडक तथा गल्लीहरूमा थुप्रिएको फोहोर संकलन गरी व्यवस्थापन गर्ने कार्य भइरहेको छ भने बजारको आवागमनमा असर नपर्ने गरी सरसफाइ अभियान सञ्चालन गरिएको महानगरपालिकाले जनाएको छ।
वर्षायामलाई ध्यानमा राख्दै पानी जम्ने जोखिम कम गर्न जाम भएका नालाहरू सफा गर्ने, थुनिएको पानीको निकास खुलाउने तथा ढल प्रणालीलाई नियमित बनाउने कामसमेत तीव्र रूपमा अघि बढाइएको छ।
कार्यवाहक नगरप्रमुख आलमको सक्रियतापछि बजार क्षेत्रको सरसफाइमा सुधार देखिन थालेको भन्दै स्थानीय व्यवसायी तथा सर्वसाधारणले महानगरपालिकाको पहलको स्वागत गरेका छन्।
महानगरपालिकाले बजार क्षेत्रलाई स्वच्छ, सुन्दर र दुर्गन्धमुक्त बनाउने अभियानलाई निरन्तरता दिने जनाएको छ। साथै, फोहोर जथाभावी नफाल्न र नालामा अवरोध पुग्ने गरी कुनै पनि सामग्री नराख्न सम्पूर्ण नगरवासीसँग अपिल गरेको छ।
COMMENTS