अभिलाष गुप्ता
वीरगञ्ज ०९ चैत
म्याग्दी जिल्लाबाट प्रतिनिधिसभा सदस्यमा निर्वाचित डा. महावीर पुन ले वीरगञ्जमा आफ्नो आत्मकथा पुस्तक बिक्री गरेका छन्। निर्वाचनपछि पहिलोपटक वीरगञ्ज आएका पुनले सोमबार घन्टाघर चोकमा पुस्तक बिक्री गरेका हुन्।
पुस्तक बिक्री कार्यक्रमप्रति स्थानीय बासिन्दाको उल्लेखनीय सहभागिता देखिएको थियो। सो क्रममा उनले रामजनम तिवारी को सालिक परिसरमा समेत पुस्तक बिक्री गरेका थिए। त्यसपछि कृषि औजार कारखानामा पुगेर पनि पुस्तक बिक्री गर्ने योजना रहेको उनले बताएका थिए।
पुस्तक बिक्रीका क्रममा पुनले “महावीर पुन आयो, किताब लिएर आयो” भन्ने नारासहित नागरिकलाई पुस्तक खरिदमार्फत सहयोग गर्न आग्रह गरेका थिए। उनका अनुसार पुस्तक बिक्रीबाट संकलित रकम कृषि औजार कारखाना सञ्चालनमा प्रयोग गरिएको छ।
उनले उक्त अभियानमार्फत हालसम्म करिब ५० जनालाई रोजगारी प्रदान गरिएको जानकारी दिएका छन्, जसले स्थानीय स्तरमै रोजगारी सिर्जना गर्न महत्वपूर्ण भूमिका खेलेको छ।
कार्यक्रममा वीरगञ्जका विभिन्न युवाहरुको पनि सक्रिय सहभागिता रहेको थियो। दिपक पटेल (बिपिएस कलेजका सञ्चालक) तथा सन्दिप कुश्वाहा लगायतका युवाहरुले पुस्तक खरिद गरी सहयोग गरेका थिए।
डा. पुनको यो अभियानले उद्यमशीलता प्रवर्द्धनसँगै स्थानीय उत्पादन र रोजगारी सृजनामा सकारात्मक सन्देश दिएको सहभागीहरुले बताएका छन्।
COMMENTS