शैलेश गुप्ता
वीरगन्ज, 7 असार।
भारतको महावाणिज्य दूतावास, वीरगन्जले १२औँ अन्तर्राष्ट्रिय योग दिवसको अवसरमा वीरगन्जस्थित ऐतिहासिक शंकराचार्य गेटमा विशेष कार्यक्रम आयोजना गरी भव्य रूपमा मनाएको छ। भारत र नेपालबीचको गहिरो सांस्कृतिक तथा आध्यात्मिक सम्बन्धको प्रतीक मानिने उक्त स्थलमा आयोजित कार्यक्रममा विभिन्न क्षेत्रका व्यक्तिहरूको उल्लेखनीय सहभागिता रहेको थियो।
कार्यक्रमका प्रमुख अतिथि मधेश प्रदेशका मुख्यमन्त्री कृष्णप्रसाद यादव रहेका थिए। विशिष्ट अतिथिका रूपमा भूमि व्यवस्था, कृषि तथा सहकारी मन्त्री श्यामप्रसाद पटेल तथा वन तथा वातावरण मन्त्री शंकरप्रसाद चौधरी सहभागी भएका थिए।
त्यसैगरी सखुवा प्रसौनी गाउँपालिकाका अध्यक्ष जसवन्त यादव, स्थानीय उद्योग–वाणिज्य क्षेत्रका प्रतिनिधि, नेपाल–भारत मैत्री संघ (निफा), पतञ्जलि योग समिति पर्सा तथा बारा, प्रमुख जिल्ला अधिकारी, प्रहरी प्रमुखलगायत विभिन्न सरकारी तथा गैरसरकारी निकायका प्रतिनिधि र सर्वसाधारणको उत्साहजनक उपस्थिति रहेको थियो।
कार्यक्रमको मुख्य आकर्षण योगका विद्यार्थीहरूले प्रस्तुत गरेको उन्नत योग आसन प्रदर्शन रहेको थियो। प्रदर्शनमार्फत योग अभ्यासमा आवश्यक अनुशासन, लचकता तथा सौन्दर्यलाई प्रस्तुत गरिएको थियो, जसको उपस्थित अतिथि तथा सहभागीहरूले उच्च प्रशंसा गरेका थिए।
कार्यक्रमलाई सम्बोधन गर्दै भारतका महावाणिज्य दूतले योगलाई भारतले विश्वलाई दिएको महत्वपूर्ण उपहारको रूपमा उल्लेख गर्दै यसको विश्वव्यापी महत्वबारे प्रकाश पारे। उनले योगले शारीरिक स्वास्थ्य, मानसिक सन्तुलन तथा सामाजिक सद्भाव प्रवर्द्धन गर्न महत्वपूर्ण भूमिका खेल्ने बताए। साथै, योगले सीमा र भूगोलभन्दा माथि उठेर नेपाल–भारत मित्रतालाई अझ सुदृढ बनाउने धारणा व्यक्त गरे।
मुख्यमन्त्री कृष्णप्रसाद यादवले अन्तर्राष्ट्रिय योग दिवस २०२६ को अवसरमा निरन्तर रूपमा योगसम्बन्धी कार्यक्रम सञ्चालन गरेकोमा भारतको महावाणिज्य दूतावास, वीरगन्जको प्रशंसा गरे। उनले यस्ता गतिविधिले जनस्वास्थ्य तथा समग्र कल्याणप्रति जनचेतना अभिवृद्धि गर्नुका साथै नेपाल–भारतबीचको सांस्कृतिक र जनस्तरको सम्बन्ध अझ प्रगाढ बनाएको बताए।
मध्यरातको वर्षाका बाबजुद पनि ठूलो संख्यामा योगप्रेमीहरू बिहानैदेखि कार्यक्रममा सहभागी भएका थिए। स्वास्थ्य, सद्भाव र समग्र कल्याणको सन्देश प्रवाह गर्ने उद्देश्यले आयोजित उक्त कार्यक्रमले सीमापार एकता, सहकार्य र स्वस्थ जीवनशैली प्रवर्द्धनमा योगको महत्वपूर्ण भूमिकालाई पुनः स्थापित गरेको आयोजकले जनाएको छ।
भारतको महावाणिज्य दूतावास, वीरगन्जले अन्तर्राष्ट्रिय योग दिवस २०२६ को अवसरमा योगका फाइदाबारे जनचेतना फैलाउन तथा नेपाल–भारत मित्रतालाई थप सुदृढ बनाउन विभिन्न कार्यक्रमहरूको श्रृंखला सञ्चालन गरेको जनाएको छ। ती कार्यक्रमहरूको समापन शंकराचार्य गेटमा आयोजित मुख्य समारोहमार्फत गरिएको थियो।
COMMENTS