जीवनजल वितरणमा तथ्याङ्क फरक देखिएपछि प्रश्न

शैलेश गुप्ता २५ जेठ, पोखरिया गर्मी मौसम सुरु भएसँगै झाडापखाला, वान्ता तथा डिहाइड्रेसनका बिरामीहरूको संख्या बढ्न सक्ने सम्भावनालाई मध्यनजर गर...

शैलेश गुप्ता २५ जेठ, पोखरिया

गर्मी मौसम सुरु भएसँगै झाडापखाला, वान्ता तथा डिहाइड्रेसनका बिरामीहरूको संख्या बढ्न सक्ने सम्भावनालाई मध्यनजर गर्दै नेपाल रेडक्रस सोसाइटी पर्सा शाखाले पोखरिया क्षेत्रमा निःशुल्क वितरणका लागि ठूलो परिमाणमा जीवनजल (ओआरएस) उपलब्ध गराएको छ। तर उक्त जीवनजल प्राप्तिको विवरणबारे दुई सरकारी निकायले सार्वजनिक गरेको तथ्याङ्क फरक देखिएपछि यसको यथार्थ अवस्थाबारे प्रश्न उठ्न थालेको छ।

नेपाल रेडक्रस सोसाइटी पर्सा शाखाले प्रादेशिक अस्पताल पोखरियाका मेडिकल सुपरिटेन्डेन्ट डा. आनन्द रौनियारलाई ५ हजार पिस तथा पोखरिया नगरपालिका अन्तर्गतको स्वास्थ्य शाखाका लागि २ हजार ५ सय पिस गरी कुल ७ हजार ५ सय पिस जीवनजल उपलब्ध गराएको जनाएको छ। उक्त सामग्री नेपाल रेडक्रस सोसाइटी पोखरिया उपशाखाका सभापति भगवान प्रसाद कुर्मीमार्फत सम्बन्धित निकायलाई हस्तान्तरण गरिएको बताइएको छ।

यसै सन्दर्भमा पोखरिया नगरपालिकाले २०८३ जेठ २५ गते नेपाल रेडक्रस सोसाइटी वीरगञ्ज शाखालाई पठाएको पत्रमा २ हजार ५ सय थान जीवनजल प्राप्त भएको जानकारी गराएको छ। नगरपालिकाको पत्रमा रेडक्रसबाट प्राप्त सामग्री स्वास्थ्य सेवा प्रयोजनका लागि उपलब्ध गराइएको उल्लेख गरिएको छ।

त्यसैगरी, सोही मितिमा प्रादेशिक अस्पताल पोखरियाले नेपाल रेडक्रस सोसाइटी पर्सा जिल्ला शाखालाई पठाएको अर्को पत्रमा ५ हजार पिस जीवनजल प्राप्त भएको जानकारी दिएको छ। अस्पतालले पनि उक्त सामग्री भगवान प्रसाद कुर्मीमार्फत प्राप्त भएको विवरण पत्रमा उल्लेख गरेको छ।

दुवै पत्र हेर्दा नगरपालिकाले २ हजार ५ सय र अस्पतालले ५ हजार पिस जीवनजल प्राप्त गरेको स्पष्ट देखिए पनि वितरण प्रक्रिया, अभिलेखीकरण तथा वास्तविक हस्तान्तरणबारे थप स्पष्टता आवश्यक रहेको सरोकारवालाहरूको भनाइ छ। कतिपय स्थानीयले प्राप्त सामग्रीको विवरण, वितरणको अवस्था र मौज्दातको जानकारी सार्वजनिक गर्नुपर्ने माग गरेका छन्।

विशेषगरी सार्वजनिक निकायमा प्राप्त हुने स्वास्थ्य सामग्रीको पारदर्शी व्यवस्थापन र अभिलेखीकरण अत्यन्त महत्वपूर्ण हुने भएकाले सम्बन्धित निकायहरूले प्राप्त तथा वितरण गरिएको जीवनजलको विस्तृत विवरण सार्वजनिक गर्नुपर्ने स्थानीयवासीको भनाइ छ। यसले भविष्यमा कुनै भ्रम वा विवाद सिर्जना हुन नदिने उनीहरूको विश्वास छ।

गर्मी मौसममा झाडापखाला तथा वान्ताका बिरामीलाई समयमै जीवनजल उपलब्ध गराउन सकिए स्वास्थ्य जटिलता कम गर्न महत्वपूर्ण सहयोग पुग्ने स्वास्थ्यकर्मीहरू बताउँछन्। त्यसैले प्राप्त सामग्री सही ढंगले लक्षित सेवाग्राहीसम्म पुगेको सुनिश्चित गर्नु सम्बन्धित निकायहरूको दायित्व रहेको उनीहरूको धारणा छ।

यस विषयमा नेपाल रेडक्रस सोसाइटी, पोखरिया नगरपालिका तथा प्रादेशिक अस्पताल पोखरियाले संयुक्त रूपमा स्पष्ट विवरण सार्वजनिक गरे जनस्तरमा उठेका जिज्ञासा र आशंका स्वतः अन्त्य हुने अपेक्षा गरिएको छ।