हिन्दी पत्रकारिताको गौरवमय २०० वर्ष पूरा भएको अवसरमा मे ३० मा भव्य समारोह आयोजना हुने
रामकृष्ण मिशन बेलूर मठमा आयोजित अन्तर्राष्ट्रिय विचार सभामा डा. कुमारले अहिंसा र शान्तिबारे विश्व समुदायसमक्ष विचार राख्ने
मे ३०, २०२६ हिन्दी पत्रकारिताको २०० वर्षे गौरवशाली इतिहासको साक्षी बन्ने भएको छ। यस ऐतिहासिक अवसरमा कोलकातास्थित कोलकाता गर्ल्स कलेजमा सार्क देशका पत्रकारहरूको सक्रिय संस्था ‘सार्क जर्नलिस्ट फोरम इन्डियन च्याप्टर’ तथा ‘भारतीय हिन्दी प्राध्यापक परिषद्’ को संयुक्त आयोजनामा अन्तर्राष्ट्रिय संगोष्ठी तथा ‘स्मरण उदन्त मार्तण्ड सम्मान समारोह २०२६’ आयोजना हुँदैछ।
उक्त समारोहमा मातृभाषा तथा मानवअधिकार पत्रकारिताका क्षेत्रमा उल्लेखनीय योगदान पुर्याएका बिहारका वरिष्ठ पत्रकार डा. शशि भूषण कुमारलाई ‘स्मरण उदन्त मार्तण्ड सम्मान २०२६’ प्रदान गरिने भएको छ।
उल्लेखनीय छ कि सन् १८२६ मे ३० मा पण्डित जुगल किशोर शुक्लद्वारा कोलकाताबाट प्रकाशित पहिलो हिन्दी समाचारपत्र “उदन्त मार्तण्ड” मार्फत हिन्दी पत्रकारिताको औपचारिक सुरुवात भएको थियो। सोही ऐतिहासिक दिनको २०० वर्ष पूरा भएको अवसरमा यो विशेष कार्यक्रम आयोजना गर्न लागिएको हो।
डा. कुमार मे ३१ मा ऐतिहासिक रामकृष्ण मिशन बेलूर मठमा आयोजना हुने एकदिने अन्तर्राष्ट्रिय विचार सभामा सहभागी भई वैशालीका भगवान महावीर र गौतम बुद्धद्वारा प्रतिपादित सत्य, अहिंसा र शान्तिको सन्देशमाथि आफ्ना महत्वपूर्ण विचार प्रस्तुत गर्नेछन्।
त्यसैगरी जुन १ मा वैशाली इन्टरनेशनल विद्यापीठ तथा ‘मानवाधिकार टुडे’ को आयोजनामा, विद्यापीठका संस्थापक तथा मानवाधिकार टुडेका सम्पादक डा. शशि भूषण कुमारको निर्देशनमा, कोलकाताकी चर्चित कवयित्री डा. उर्वशी श्रीवास्तवको संयोजनमा अन्तर्राष्ट्रिय सम्मान समारोह आयोजना हुनेछ। कार्यक्रममा ५१ जना पत्रकार, साहित्यकार तथा शिक्षाविद्हरूलाई “तेज प्रताप चौहान अन्तर्राष्ट्रिय सम्मान २०२६” तथा “पद्मभूषण पण्डित राहुल सांकृत्यायन शिक्षा विरासत सम्मान २०२६” प्रदान गरिने जनाइएको छ।
डा. शशि भूषण कुमार यसअघि पनि विभिन्न अन्तर्राष्ट्रिय सम्मानबाट सम्मानित भइसकेका छन्। यसै वर्ष श्रीलंकाको चर्चित संस्था ‘साउथ एशिया कोलाबोरेशन फाउन्डेशन’ ले दक्षिण एशियाली देशहरू—भारत, नेपाल, बंगलादेश, भूटान र श्रीलंकामा पत्रकारिता नेतृत्वका लागि उनलाई “South Asia Hero Award 2026” प्रदान गरेको थियो।
त्यस्तै, सन् २०२५ मा नेपालका मातृभाषा पत्रकारिताका अग्रणी धर्मादित्य धर्माचार्यको नाममा प्रदान गरिने “धर्मादित्य धर्माचार्य अन्तर्राष्ट्रिय मातृभाषा पत्रकारिता सम्मान–२०२५” बाट पनि डा. कुमार सम्मानित भएका थिए। साथै थाइल्याण्ड, मौरिसस लगायत विभिन्न देशका प्रतिष्ठित सम्मानहरूबाट पनि उनी सम्मानित भइसकेका छन्।
COMMENTS