रौटहट, ४ फागुन । रौतहटको फतुवा विजयपुर नगरपालिका–६ पेटभरवामा एकजना पतिले आफ्नै पत्नीको हत्या गरेर फरार भएका छन् ।
सो ठाउँका ४५ वर्षीय महन्थ राय यादवले ३५ वर्षीया पत्नी आरतीदेवी यादवको हत्या गरी फरार भएको प्रहरीले जनाएको छ ।
प्रहरीले घटनास्थलबाट हत्यामा प्रयोग गरिएको बञ्चरो र दाउ बरामद गरेको छ । आरतीको टाउको र घाँटीमा बञ्चरो तथा दाउ प्रहार गरी हत्या गरेको प्रारम्भिक अनुसन्धानबाट खुलेको प्रहरीले जनाएको छ ।
होटल व्यवसाय सञ्चालन गर्दै आएका महन्थ र विभिन्न स्थानमा कामको सिलसिलामा बाहिर बस्दै आएकी आरतीबीच विगत केही वर्षदेखि सम्बन्ध सुमधुर थिएन । करिब डेढ वर्षपछि पाँच दिनअघि मात्र घर फर्किएकी आरतीको शनिवार राति सुतिरहेकै अवस्थामा हत्या गरिएको प्रहरीको अनुमान छ । आइतवार बिहान अबेरसम्म पनि घरको ढोका नखुलेपछि स्थानीयले शंका लागेर प्रहरीलाई खबर गरेका थिए । जनप्रतिनिधिको रोहवरमा इलाका प्रहरी कार्यालय सन्तपुर दोस्तियाबाट खटिएको टोलीले ढोका खोल्दा आरती आफ्नै ओछ्यानमा मृत फेला परेकी थिइन् ।
घटनापछि फरार रहेका महन्थले वडा अध्यक्ष राम एकवाल यादवसँगको फोन सम्पर्कमा श्रीमतीको चरित्रमाथि शंका गर्दै आफूले हत्या गरेको स्वीकारेका छन् । उनले प्रहरीसमक्ष आत्मसमर्पण गर्ने बताए तापनि हालसम्म उनी फरार नै रहेकाले प्रहरीले उनको खोजी कार्य तीव्र बनाएको छ ।
मृतकको शव पोस्टमार्टमका लागि प्रादेशिक अस्पताल गौर पठाइएको जिल्ला प्रहरी कार्यालय रौतहटका प्रमुख एसपी सीताराम रिजालले जानकारी गराएका छन् ।
COMMENTS