राष्ट्रिय स्वतन्त्र पार्टी (रास्वपा) की समानुपातिक उम्मेदवार तथा काठमाडौँ निवासी कृपा महर्जन निर्वाचन प्रचार–प्रसारका क्रममा पर्सा जिल्लामा पाँच दिनसम्म सक्रिय रूपमा खटिएकी छन्। पार्टीको केन्द्रीय निर्णय अनुसार पर्सा पठाइएकी महर्जनले जिल्लाका चारै निर्वाचन क्षेत्रका प्रत्यक्ष उम्मेदवारहरूसँग मिलेर जनताका घरदैलोमा पुग्दै मत मागेकी हुन्।
महर्जनले वर्तमान राजनीतिक परिस्थितिलाई मध्यनजर गर्दै देशमा परिवर्तन र स्थिर सरकारको आवश्यकता रहेको उल्लेख गर्दै त्यसका लागि रास्वपालाई बहुमत दिलाउन घन्टी चिन्हमा मतदान गर्न आग्रह गरिन्। उनले पर्सा क्षेत्र नं. १ अन्तर्गत बिरगञ्जलगायतका स्थान, क्षेत्र नं. २ का विभिन्न वार्ड, क्षेत्र नं. ३ को बहुदरमाई नगरपालिकाका विभिन्न वार्ड तथा क्षेत्र नं. ४ अन्तर्गत ठोरीलगायतका क्षेत्रमा उम्मेदवारहरूसँगै पुगेर मत मागेकी थिइन्। पर्साका चारै निर्वाचन क्षेत्रका उम्मेदवार विजयी हुनेमा आफू विश्वस्त रहेको उनले बताइन्।
यसैबीच, धोबिनी गाउँपालिकामा आयोजित कार्यक्रममा विभिन्न राजनीतिक दल परित्याग गरी रास्वपामा प्रवेश गरेका व्यक्तिहरूलाई महर्जनले स्वागत गरेकी थिइन्। उक्त कार्यक्रममा रास्वपाकी पर्सा जिल्ला कार्यबाहक सभापति तुलसा अधिकारी पनि महर्जनसँगै सहभागी थिइन्।
पाँच दिनको बिरगञ्ज बसाइका क्रममा रास्वपाप्रति जनताको बढ्दो लगाव र निर्वाचनप्रतिको उत्साह देखेर पार्टीले आगामी निर्वाचनमा स्पष्ट बहुमत ल्याउनेमा आफू ढुक्क रहेको महर्जनको भनाइ छ।
COMMENTS