हैबुल समानी 6 माघ वीरगञ्ज
पर्सा जिल्ला निर्वाचन क्षेत्र नम्बर-३ बाट प्रतिनिधिसभा सदस्यका लागि आम जनता पार्टी (आजपा) का उम्मेदवार मोहम्मद इस्तखारले आज औपचारिक रूपमा आफ्नो मनोनयन पत्र दर्ता गराएका छन्।
निर्वाचन अधिकृतको कार्यालयमा सम्पन्न मनोनयन दर्ता कार्यक्रममा पार्टीका केन्द्रीय तथा जिल्ला तहका नेता, कार्यकर्ता, युवा, बुद्धिजीवी र सर्वसाधारण समर्थकहरूको उल्लेखनीय उपस्थिति रहेको थियो।
मनोनयन दर्ता पश्चात सञ्चारकर्मीहरूसँग संक्षिप्त प्रतिक्रिया दिँदै उम्मेदवार इस्तखारले पर्सावासी जनताको भरोसा, आशा र अपेक्षालाई आत्मसात गर्दै चुनावी प्रतिस्पर्धामा उत्रिएको बताए। उनले यो निर्वाचन केवल पद प्राप्तिका लागि नभई जनताको हक-अधिकार सुनिश्चित गर्ने, सुशासन कायम गर्ने र समावेशी विकासको अभियान भएको स्पष्ट पारे।
इस्तखारले विशेष गरी युवालाई केन्द्रमा राखेर रोजगारी सिर्जना, शिक्षा र स्वास्थ्य सेवामा सुधार, कृषि तथा साना उद्योग प्रवर्द्धन, भ्रष्टाचारमुक्त प्रशासन र पारदर्शी विकास योजनालाई आफ्नो प्रमुख एजेन्डा बनाइने उल्लेख गरे।
"पर्सा-३ का जनताले वर्षौंदेखि भोग्दै आएको समस्या अब अन्त्य गर्नुपर्छ, राजनीति सेवा र इमान्दारिताको माध्यम बन्नुपर्छ,” उनले भने।
आम जनता पार्टीका नेताहरूले पनि इस्तखारको उम्मेदवारीले पर्सा-३ मा नयाँ राजनीतिक विकल्प प्रस्तुत गरेको दाबी गरेका छन्। पार्टीका अनुसार जनमुखी नीति, जनताको प्रत्यक्ष सहभागिता र जवाफदेही नेतृत्वमार्फत क्षेत्रको समग्र विकास सम्भव हुने विश्वास लिइएको छ।
मनोनयन दर्ता कार्यक्रमपछि पार्टी समर्थकहरूले नारा-जुलुस गर्दै उत्साहपूर्ण वातावरण सिर्जना गरेका थिए। सहभागीहरूले “सुशासन, रोजगारी र विकास” आम जनता पार्टीको मूल नारा रहेको भन्दै परिवर्तनको पक्षमा मतदान गर्न पर्सा-३ का मतदातालाई आग्रह गरेका छन्।
यससँगै पर्सा निर्वाचन क्षेत्र नम्बर-३ मा प्रतिनिधिसभा सदस्यका लागि चुनावी माहोल थप तातेको छ। आगामी दिनमा उम्मेदवार मोहम्मद इस्तखारले घरदैलो कार्यक्रम, आमसभा तथा जनसंवादमार्फत जनतासँग प्रत्यक्ष भेटघाट गर्दै आफ्नो एजेन्डा प्रस्तुत गर्ने तयारी गरिरहेको पार्टीले जनाएको छ।
COMMENTS