अभिलाष गुप्ता ०२ माघ वीरगञ्ज
वीरगञ्ज–२५ सिरिसियामा अवस्थित मानव सेवा आश्रम वीरगञ्ज शाखामा नेपाल प्रहरी प्रमुख (आइजीपी) दानबहादुर कार्की, मधेस प्रदेश प्रहरी प्रमुख गोविन्द थपलिया तथा पर्सा प्रहरी प्रमुख सुदिपराज पाठकले आश्रममा आश्रित आमाबुवाहरूका लागि दिउँसोको खाजा सेवा प्रदान गर्नुका साथै अति आवश्यक खाद्यान्न सामग्री र नगद १० हजार रुपैयाँ सहयोग प्रदान गर्नुभएको छ।
मानव सेवा आश्रम वीरगञ्जका संस्थापक देवेश गुप्ताका अनुसार समाजका असहाय, बेसहारा तथा त्यागिएका आमाबुवाहरूको सेवामा समर्पित आश्रमको गतिविधिप्रति प्रहरी नेतृत्वको यो सहयोगले आश्रम परिवारलाई थप हौसला मिलेको छ।
कार्यक्रममा आइजीपी दानबहादुर कार्कीका पीएसओ एवं प्रहरी निरीक्षक निरोज चौलागाईं, मानव सेवा आश्रमका अभिभावक प्रकाश थारु, कमल चौगाई, डा. निरज सिंह, डा. प्रिति यादव, मौसमी श्रेष्ठ, आश्रमका स्वयंसेवक ओम झा, सोनु चौरसिया, पियुष कानुन, सुजित गुप्ता, प्रधुमन सराफ, पवन कलवार र आर्यन गुप्ताको उपस्थिति रहेको थियो।
कार्यक्रमलाई सम्बोधन गर्दै आइजीपी दानबहादुर कार्कीले मानव सेवा आश्रमले समाजका उपेक्षित र बेसहारा नागरिकहरूका लागि गर्दै आएको कार्य अत्यन्तै सराहनीय रहेको बताउनुभयो। उहाँले नेपाल प्रहरीले एक जना प्रहरी चौबिसै घण्टा आश्रममा रहने व्यवस्था मिलाइसकेको जानकारी गराउँदै, आगामी दिनमा पनि नेपाल प्रहरीको तर्फबाट आवश्यक सहयोग र साथ निरन्तर रहने प्रतिबद्धता व्यक्त गर्नुभयो।
सामाजिक सेवामा प्रहरी प्रशासनको सक्रिय सहभागिताले मानव सेवा आश्रमजस्ता संस्थाहरूलाई थप मजबुत बनाउने र समाजमा सकारात्मक सन्देश प्रवाह हुने विश्वास कार्यक्रम सहभागीहरूले व्यक्त गरेका थिए।
COMMENTS