सैलेश गुप्ता
बीरगंज, १२ माघ
भारतको महावाणिज्य दूतावास, बीरगंजले आफ्नै परिसरभित्र आज भारतको ७७औँ गणतन्त्र दिवस समारोह भव्य रूपमा आयोजना गरेको छ। समारोहको सुरुवात महावाणिज्यदूत डी. एस. मीनाले भारतको राष्ट्रिय झण्डा फहराउँदै गर्नुभएको थियो। त्यसपछि उहाँले भारतका राष्ट्रपति द्वारा पठाइएको गणतन्त्र दिवस सन्देशको वाचन गर्नुभएको थियो।
समारोहमा विशेष शिक्षा विद्यालयसहित बीरगंजका १२ वटा विभिन्न विद्यालयका विद्यार्थीहरूले आकर्षक सांस्कृतिक कार्यक्रम प्रस्तुत गरेका थिए। नृत्य, गीत तथा विविध सांस्कृतिक प्रस्तुतिहरूमार्फत विद्यार्थीहरूले देशभक्ति, एकता र संस्कृतिको सन्देश प्रवाह गरेका थिए। उनीहरूको मनमोहक प्रस्तुतिले उपस्थित दर्शकहरूलाई मोहित बनाउँदै उच्च देशभक्तिको भावना सहित भरपूर मनोरञ्जन प्रदान गरेको थियो।
कार्यक्रममा बीरगंज महानगरपालिकाका मेयर राजेशमान सिंह, पूर्व केन्द्रीय मन्त्री, प्रमुख जिल्ला अधिकारी, सहायक प्रमुख जिल्ला अधिकारी, प्रहरी उपरीक्षक, सशस्त्र प्रहरी बलका उपरीक्षक, बीरगंज उद्योग वाणिज्य संघका प्रतिनिधिहरू, नेपाल–भारत उद्योग वाणिज्य संघका प्रतिनिधिहरू, कविहरू, स्थानीय व्यापारीहरू, नेपाल–भारत मैत्री संघका प्रतिनिधिहरू, विद्यालयका प्रधानाध्यापक तथा शिक्षक–शिक्षिकाहरू, विद्यार्थीहरू लगायत विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो। कार्यक्रममा करिब ५ सय जनाभन्दा बढीको सहभागिता रहेको दूतावासले जनाएको छ।
गणतन्त्र दिवस समारोहका साथै दूतावास परिसरभित्र भारतको राष्ट्रिय गीत “वन्दे मातरम्” को १५०औँ वार्षिकोत्सवको अवसरमा राष्ट्रिय गीत प्रदर्शनी पनि आयोजना गरिएको थियो। उक्त प्रदर्शनीमा विशेष गरी विद्यालयका विद्यार्थी, शिक्षक–शिक्षिकाहरू तथा सर्वसाधारणको उल्लेखनीय सहभागिता रहेको थियो।
समग्रमा, भारतको गणतन्त्र दिवस समारोहले नेपाल–भारतबीचको मैत्री सम्बन्ध, सांस्कृतिक आदान–प्रदान र आपसी सद्भावलाई थप सुदृढ बनाएको सहभागीहरूले बताएका छन्।
COMMENTS