पर्सा, बैशाख ९ — पोखरिया नगरपालिका मा आज आयोजित एक कार्यक्रमका बीच १५ सदस्यीय बालिका तथा सामाजिक शिक्षा सञ्जाल गठन गरिएको छ। बालिका सशक्तिकरण तथा सामाजिक चेतना अभिवृद्धि गर्ने उद्देश्यसहित सञ्जाल गठन गरिएको हो।
नगर उपप्रमुख रुवी कुमारी ठाकुर को संयोजकत्वमा गठन गरिएको उक्त सञ्जाल, नगर प्रमुख प्रदुमन प्रसाद चौहान को अध्यक्षतामा सम्पन्न कार्यक्रममार्फत औपचारिक रूपमा घोषणा गरिएको हो। कार्यक्रममा नगरपालिकाभित्रका विभिन्न सरोकारवाला निकाय, जनप्रतिनिधि तथा सामाजिक अगुवाहरूको उल्लेख्य उपस्थिति रहेको थियो।
कार्यक्रममा सञ्जाल गठनसँगै यसको कार्यक्षेत्र, जिम्मेवारी तथा आगामी कार्ययोजनाबारे समेत छलफल गरिएको जनाइएको छ। सहभागीहरूले बालिका शिक्षा, लैङ्गिक समानता, सामाजिक सचेतना तथा सशक्तिकरणका कार्यक्रमहरूलाई प्रभावकारी रूपमा सञ्चालन गर्नुपर्नेमा जोड दिएका थिए।
नवगठित सञ्जालमा नगर प्रमुख चौहानलाई संरक्षक, उपप्रमुख ठाकुरलाई संयोजकको जिम्मेवारी दिइएको छ। सदस्यहरूमा वडा अध्यक्ष लक्ष्मण साह कानु सहित कौशल कुमार झा, शिव कुमार पटेल, हस्तयानी गिरी, पसुराम हजरा, राजकुमार साह, राजकुमारी चौहान, महादेव साह कानु, तेत्तरी देवी दास, दिनेश प्रसाद चौहान, सिमा देवी, प्रतिमा देवी तथा ललन कुमार पटेल चयन भएका छन्।
नवगठित सञ्जालले आगामी दिनमा बालबालिका, विशेषगरी बालिकाको शिक्षा, स्वास्थ्य, अधिकार तथा सामाजिक सुरक्षासम्बन्धी कार्यक्रमहरू सञ्चालन गर्ने अपेक्षा गरिएको छ। साथै, स्थानीय तहमा सामाजिक विकृति तथा कुरीतिविरुद्ध जनचेतनामूलक अभियान सञ्चालन गर्ने योजना समेत अघि सारिएको छ।
COMMENTS