जगरनाथपुर, साउन ३१ गते
राष्ट्रिय स्वतन्त्र पार्टी (रास्वपा) जगरनाथपुर गाउँपालिका सभापति पशुराम साह कानुको नेतृत्वमा अगुवा युवा, समाजसेवी तथा स्थानीय नेताहरूले पर्सा बीओपी भिखमपुरका डीएसपी इन्चार्जसँग औपचारिक भेटघाट तथा सीमा सुरक्षासम्बन्धी महत्वपूर्ण छलफल गरेका छन्।
आज २०८३ साल साउन ३१ गते भएको भेटघाटका क्रममा सीमावर्ती क्षेत्रका नागरिकले दैनिक आवतजावतका क्रममा भोग्दै आएका कठिनाइ, सीमा क्षेत्रमा देखिएका समस्या तथा सर्वसाधारणको सहज आवागमनका विषयमा विस्तृत छलफल गरिएको थियो।
टोलीले सीमा क्षेत्रमा बसोबास गर्ने स्थानीय नागरिकलाई आवतजावतका क्रममा अनावश्यक कठिनाइ नहुने गरी सुरक्षा व्यवस्था र नागरिकमैत्री व्यवहारलाई प्रभावकारी बनाउन सम्बन्धित सुरक्षा निकायसँग आग्रह गरेको थियो।
छलफलका क्रममा सीमा क्षेत्रमा हुने गैरकानुनी गतिविधि नियन्त्रणसँगै इमानदार तथा सर्वसाधारण नागरिकको सहज आवतजावत सुनिश्चित गर्न आवश्यक समन्वय र सहकार्य गर्नुपर्नेमा जोड दिइएको थियो।
रास्वपा जगरनाथपुर गाउँपालिका सभापति पशुराम साह कानुले सीमा सुरक्षा महत्वपूर्ण विषय भए पनि सीमावर्ती नागरिकका दैनिक समस्या र जायज गुनासोलाई पनि संवेदनशील रूपमा सम्बोधन गर्नुपर्ने बताए। उनले स्थानीय नागरिक, सुरक्षा निकाय तथा सरोकारवाला पक्षबीच निरन्तर संवाद र सहकार्य आवश्यक रहेको धारणा व्यक्त गरे।
भेटघाट तथा छलफलमा कृष्णमोहन प्रसाद यादव, मनोज महतो केवट र लहायत लगायतका अगुवा युवा, समाजसेवी तथा स्थानीय व्यक्तिहरूको सहभागिता रहेको थियो।
छलफल सकारात्मक र उपलब्धिमूलक रहेको सहभागीहरूले बताएका छन्।
COMMENTS